Mendia, presoak hurbiltzearen alde 'birgizarteratzea errazteko'

PSEren idazkari nagusi Idoia Mendiak uste du "ona" litzatekeela Espainiako Gobernuak presoen sakabanaketarekin bukatzea, Euskal Herriko kartzeletara hurbilduz, EFEri emandako elkarrizketa batean esan duenez.

"Ona litzateke Espainiako Gobernuak Alderdi Sozialistak aldarrikatzen duen espetxe-politika egitea, Estatu senarekin; adibidez, presoak Euskal Herritik gertuago dauden kartzeletara hurbiltzea, familiarrekiko eta inguruarekiko harremanak errazteko eta gaur Euskadin dagoen errealiteatea ikus dezaten", esan du.

Mendiaren arabera, presoak hurbiltzeak "bakoitzaren birgizarteratzea eta euskal gizarteari egindako minaren aitortzea lagunduko lituzke", bide legalak ez onartzeko erabakia "aldatzen hasi diren honetan".

Euskal sozialisten idazkari nagusiarentzat ETAren desarmea "ez da helburu bat berez". "Euskal herritarren gehiengoak nahi duena ETA erakunde bezala desagertzea da", esan du. Mendiaren arabera, "zuloen koordenatuak ematea nahikoa da".

ETA desagertzeak presoei mesede egingo lieke "beren egoera automatikoki aldatuko litzatekeelako". "Gertatu beharreko pauso handia da", uste du Mendiak. Eusko Jaurlaritzak "desarmeari laguntzearen" edo Espainiako eta Frantziako gobernuarekin "bitartekaritza lanak egitearen" alde dago, "beti ETA desagertzeko helburuarekin".

Eusko Legebiltzarreko elkarbizitza lantaldeari dagokionez, Mendiak sozialistak egotea defendatu du, PPk parte hartu ez arren, nahiz eta popularrak egotea "ona" litzatekeela uste duen.

Autogobernuaren erremormari buruz, euskal sozialisten idazkari nagusiak "ahalegin bat" eskatu du ezker abertzalea "Estatutuaren adostasunera" batzeko PP galdu gabe, "oso lan zaila".

Bukatzeko, Idoia Mendiak esan du sozialistek espero duten "galdeketa bakarra" legalki onartutako Estatutu berri baten berrespenaren erreferenduma dela.