Rajoy eta Rivera datorren astean bilduko dira berriro

Mariano Rajoy PPko presidentea eta Albert Rivera Ciudadanoseko buruzagia datorren astean bilduko dira berriro, atzo bien arteko komunikazio eta "negoziazio bide bat" zabaldu eta gero.

Pablo Casado PPko Komunikazio idazkariordeak iragarri duenez, batzarra aste erdialdean egingo dute ziurrena. Casadoren hitzetan, jarduneko presidentea oso pozik dago Ciudadanosen jarrera aldaketarekin eta bileran erdietsitako "aurrerapausoarekin".

Inbestidura saioaren balizko dataren inguruan ere galdetu diote Casadori Antena 3 telebista kateari eskainitako elkarrizketan. Esan duenez, datorren astean izatea "nahiko" lukete, baina hori posible ez bada, "asko jota" abuztu amaieran edo iraila hasieran egitea dute asmo.

"Abuztuko azken astea, edo azken aurrekoa. Biak oso onak dira, gure ustez, baina ez dago gure esku", nabarmendu du.