Politika -
Erabakia
Zigorrik ez Sabino Cuadrarentzat, baina atzera egiteko eskatu diote
Kongresuko Mahaiak ohartarazi duenez, "iraina erretiratu" ezean araudiko "neurri zorrotzenak" ezarriko dizkiote. Halere, Cuadrak uko egin dio esandakoa zuzentzeari, egindakoa ez delako "iraina".
Agentziak | Erredakzioa
Oraingoz, zigorrik gabe. Hala geratu da Kongresuak Sabino Cuadra Amaiurreko diputatuaren kontra abiatutako auzia. Espainiako Konstituzioaren orrialde batzuk apurtu zituela eta, haren kontrako prozedura abiatu zuen ganberak, eta gaur aztertu du afera Mahaiak.
Dena dela, Cuadra bera eta Xabier Mikel Errekondo Amaiurreko bozeramailea ostegunerako deitu ditu Jesus Posada Kongresuko presidenteak, eta egindako "iraina erretiratzeko" eskatuko dio. Hori egin ezean, ganberako araudian jasota dauden "neurri zorrotzenak" ezarriko dizkiote, Posadak ohartarazi duenez.
Irailaren 16ko osoko bilkuran, Konstituzionala erreformatzeko eztabaidan, apurtu zituen Cuadrak Konstituzioaren orrialde horiek. Espainiako batasunari dagozkion pasarteak jasotzen dituztenengatik protesta egiteko egin zuen, hitzaldian azaldu zuenez:
Kongresuko Mahaiak aho batez (PPko eta PSOEko diputatuek bakarrik dute ordezkaritza bertan) onartu duen adierazpen batean, Cuadrak egindakoa "erabat arbuiatu" du erakundeak, herritar guztiei egindako "irain onartezina" eta "askatasunaren sinbolo" den Konstituzioari "laidoa" dela ulertuta.
Cuadrak ez du barkamena eskatuko
Halere, Cuadrak uko egin dio esandakoa zuzentzeari eta barkamena eskatzeari, bere ustean, egindakoa ez delako "iraina".
Jesus Posada Kongresuko presidenteak Cuadra eta Xabier Mikel Errekondoko Amaiurreko kideak deitu ditu datorren ostegunerako, diputatu abertzaleak "egindako iraina" zuzen dezan.
Aldiz, Cuadrak berretsi egin du gaur egindakoa eta berriz ere esan du "ohiko" keinua izan zela, diskurtsoa sendotzeko, Konstituzioa ez baita askatasunaren ikur, "inposizioarena baizik".
"Gure ustean ez da irain pertsonala ez instituzionala. Norbait iraindua sentitu baldin bada, hori ez zen gure asmoa, baina ez daukat besterik gaineratzeko", esan du Cuadrak Kongresuko korridoreetan.
Halaber, Cuadrak aurreratu egin duenez, datorren osteguneko bileran aipatutako mezua helaraziko dio Posadar, eta gogorarazi egin du, era berean, Posadak berak amaitutzat eman zuela gertatutakoa, egunean bertan.