Finaleko txistuengatik kereila jarri du Manos Limpiasek taldeen aurka

Manos Limpias sindikatuak kereila aurkeztu du Bartzelona eta Athletic futbol taldeen aurka, Errege Kopako finaleko txistualdiagatik. Horren esanetan, bi delitu egin ziren maiatzaren 30eko finalean: Espainiari irain egitea eta Konstituzioak bermatzen dituen oinarrizko eskubideen kontrakoa.

Sindikatuak idatzi bat aurkeztu zuen atzo Bartzelonako epaitegietan. Sindikatuaren hitzetan, Espainiako ereserkiari zaleek egindako txistualdiaren erantzule zuzenak dira Athletic eta Bartzelona taldeak, eta Felipe VI.a Estatuburuaren aurrean sinbolo nazionaletako bat gutxiestea eta iraintzea leporatzen die.

Bestalde, txistualdia erraztu eta Espainiako erakundeen eta, oro har, gizarte osoaren kontrako gorrotoa sustatu zuten beharrezko kolaboratzaileen kontra ere zuzendu du kereila. Halaber, Angel Maria Villar Espainiako Futbol Federazioko presidenteak lekuko gisa deklaratzea eskatu du.