Kataluniak hilaren 16an onartuko du kontsultaren eskumena eskatzea

Kataluniako Parlamentuko Bozeramaileen Batzordeak eta Mahaiak kontsultaren inguruko eztabaida urtarrilaren 16an egitea onartu du. Kontsulta izango dute eztabaidagai bakarra, eta orduan onartuko dute (CiU, ERC, ICV-EUiA eta CUPen babesarekin) Diputatuen Kongresuari erreferendumak egiteko eskumena eskatzea.

Kontsulta babesten duten alderdiek eskatuta egingo da osoko bilkura, hain zuzen ere, Konstituzioaren 150.2 artikuluak aitortzen dituen eskumenak, erreferendumei buruzkoak, Generalitateari emateko eskaria egin nahi baitute.

Alderdiek eta Artur Mas presidenteak 2014ko kontsulta egiteko adostu zuten ibilbide orrian jasotako pausoetako bat da hori.

PPCk, Ciutadansek eta PSCk gogor kritikatu dute kontsultaren inguruko bilkura bat egiteko adostasuna lortu izana, baina ekonomia suspertzeko gaien inguruko saio bat egiteko gai ez izatea.

Osoko bilkura urtarrilaren 16an izango da, 11:00etatik aurrera.