ETAren desarmatzea izango da urte politikoaren gakoa, Barrenaren ustez

Pernando Barrena Sorturen bozeramailearen esanetan, ETAren desarmatzea eta espetxe politika izango dira datozen ikastaro politikoaren "gakoak", eta "datozen asteetan" ETAk bere gogoetaren berri emango du. Horrez gain, EAJri berak ere autokritika egin behar duela esan dio.

Radio Euskadin eskainitako elkarrizketa batean Barrenak esan duenez, "ezker abertzaleak, hartu dituen erabakiak hartuta eta egin dituen gogoeta politikoak eginda, esku artean dugun agertuko politikoa ahalbidetu du", eta "alde bakarreko ikuspegiarekin egin du, beste aldearen konpromisorik eta erantzunik gabe".

ETAk "erabaki handiak hartu ditu eta horiekin aldaketa handiak eragin ditu", horren aburuz, eta, hortaz, "ez litzateke bidezkoa izango eta ez luke errealitatea islatuko ETAk blokeorako jarrera duela edo ekimen politikoarekin ari ez dela esatea".

ETAren desarmatzeari buruz, "udaren ostean" ETAk bere gogoetaren berri emango duela eta "norabide horretan izango da", esan du Barrenak.

Bestalde, Joseba Egibarrek ostegun honetan ezker abertzaleari azken urteetan gertatutakoagatik "erantzukizun politikoa" eskatu izana kritikatu du Barrenak; izan ere, adierazpen horiekin jeltzaleak "ikusleak" izango balira bezala hitz egin dutela uste du Sorturen bozeramaileak.

Hori dela eta, "autokritika beharrezkoa da, baina era kolektiboan egin behar da eta bakoitzak bere erantzukizunak onartu behar ditu", Barrenaren esanetan. "Egibarrek eta EAJk ere egin behar dute"; gaineratu du.