PSEren ustez, zerga arloko akordioa Legebiltzarrera eraman behar da

Idoia Mendia PSE-EEren bozeramaileak adierazi duenez, bere alderdiak eta EAJk zerga arloan akordio bat adostuz gero, erreforma horrek Legebiltzarraren babesa jaso beharko du,  Legebiltzarra lurralde historikoen politika fiskalaren "oinarriak" ezarriko dituen erakundea izango delako.

Legebiltzarrak zerga politikaren diseinuan "protagonismoa" izatea sozialistentzat "ezinbesteko" baldintza dela esan du Mendiak Radio Euskadin emandako elkarrizketa batean.

Zerga politikaren, ekonomiaren, erakundeen erreformaren eta zerbitzu publikoen baitako lau batzarrak direla garrantzitsuak esan du Mendiak. Dena den, zerga arloko erreformak eta ekonomiaren eta enpleguaren suspertzeak "lehentasuna" dutela esan du, urtarrilaren 1etik aurrera indarrean sartu ahal izateko epe laburragoa dutelako.

Dena den, Mendiak Joseba Egibar EAJren Legebiltzarreko bozeramailea kritikatu du. Mendiaren ustez, Egibarrek "ez du batere laguntzen" zerga arloan akordiorik lortzen ez bada beste hiru gaietan itunak lortzea ezinezkoa izango dela esanda "mehatxu eginez".