Mundua -
Ebazpena
Venezuelako Gorenak Ortegaren senarra atxilotzea agindu du, ustelkeriagatik
Fiskaltzaren bidez eta estortsioa eginda dirua irabaztea leporatu diote Luisa Ortega fiskal nagusi ohiaren senarrari.
agentziak | erredakzioa
Venezuelako Auzitegi Gorenak German Ferrer atxilotzeko agindua eman du. Ferrer Luisa Ortega fiskal nagusi ohiaren senarra da.
Ministerio Publikoak Fiskaltzaren bidez eta estortsioa eginda dirua irabaztea leporatu dio Ferrerri.
"Auzitegi Gorenaren Lege Organikoaren 116. artikuluak ezartzen duenez, bidezkoa da German Dario Ferrer diputatua atxilotzea", dio epaiak. Hala, Tarek Saab fiskal nagusi berriak egindako eskaera aintzat hartu dute.
Auzitegiaren arabera, Ferrerek ez du aurrepaiketa egiteko eskubiderik izango, goi-kargudunen aurka egin ohi denekin ez bezala, "delitu goria" delako.
Fiskaltzak ziurtatu du Ferrerek eta beste akusatu batzuek Bahametan (6 milioi dolar inguru gordetzen zituzten) banku kontuak irekitzean sinatutako jatorrizko agiriak dituzte.
Ferrer Venezuelako Alderdi Sozialista Bateratuaren diputatua izandakoa da. Nicolas Madurorekin lotura hautsi eta berezko talde parlamentario egin zuten Parlamentu venezuelarrean.
