Ben Carson errepublikanoa Etxe Zurirako lehiatik erretiratu da

Ben Carson hautagai errepublikanoak gaur baieztatu duenez, Etxe Zurirako lehiatik erretiratuko da. Carsonen esanetan, polemikatik urrun dagoen haren hitzaldiak ez du mugimendu politikoaren eztabaidarekin bat egiten.

Erabaki hori hartzera bultzatu duten arrazoiez galdetuta, Carsonek erantzun du ez duela matematikoki posible ikusten garaipena lortzea. Hori dela eta, etxean ez gelditzeko eta orain arte haren aurkari izan direnetako baten alde egiteko eskatu die haren jarraitzaileei, demokratei mesede ez egiteko.

"Astearte handian" eskuratutako emaitza txarren ondotik, hautagai errepublikanoak adierazi zuen ez zuela etorkizunik ikusten Etxe Zurirako bideak eta atzo hautagai errepublikanoen artean Detroiten (Michigan) izandako eztabaidan parte hartzeari uko egin zion. Gainera, haren etorkizun politikoaz gaur hitz egingo zuela aurreratu zuen.

Carsonek 8 ordezkari baino ez ditu lortu eta errepublikanoen artean 1.237 delegatu eskuratu behar ditu hautagai irabazleak. Are gehiago, ez du estatu bakar batean ere irabazi eta Alaskan erdietsi zituen emaitzarik onenak, botoen % 10,9 eskuratuta.