Eurotaldearekin negoziatzeko 'zailena orain dator', Tsiprasen esanetan

Alexis Tsipras Greziako lehen ministroak larunbat honetan azaldu duenez, Eurotaldearekin negoziatzerako orduan "zailena orain dator". Ostiral honetan finantza-erreskatea lau hilabete luzatzea adostu zuten Greziak eta Eurotaldeak.

Telebistaren bitartez zabaldutako agerraldi batean Tsiprasek azpimarratu duenez, "bataila bat irabazi dugu, baina ez gerra osoa. Konplikatuena orain hasiko da". Lehen ministroak azpimarratu duenez, Greziak "negoziazio arrakastatsua lortu du".

"Gure herrialdea itotzeko asmoa duen indar kontserbadoreen planak porrot egin zuen atzo, eta erakutsi genuen, sumisio eta zigorra baino gehiago, Europa negoziaziorako tokia dela, eta alde bientzako konpromiso onuragarriak har ditzakegula", nabarmendu du Tsiprasek.

Hazkundea eta enplegua sortzeko

"Atzo egun garrantzitsuagoa izan zen Europarentzat, Greziarrentzat baino", esan du. Gainera, Tsiprasek gogoratu duenez, duela 20 egun herriaren gidaritza hartu zuenean, "amildegitik erortzeko zorian geunden, eta diru-kutxak hutsi zeuden".

"Atzo lotutako itunak atzean utziko ditu zorroztasun eta erreskate-programak, eta hazkundea, enplegua eta gure etorkizun europarra lortzeko negoziazioaren abiapuntua da", nabarmendu du. Halaber, Eurotaldearekin adostutako akordioak "soldaten eta pentsioen murrizketekin, eta superabit handiegiekin amaitzen du".

Amaitzeko, greziar herritarrei eskerrak eman dizkie, "Gobernuaren aliaturik onena izan baita". "Ezinezkoa izango litzateke zuen babesik gabe bataila hau irabaztea", esan die.

Erreforma zehatzak

Greziaren finantza-erreskatea lau hilabete luzatzea adostu ostean, erlojuaren kontra lanean ari da Atenaseko Gobernua, astelehenean erreforma zehatzak aurkeztu behar dituelako.

Txostena jaso eta gero, instituzioek proposatutako neurri horiek aztertuko dituzte, eta "abiapuntu egoki" diren ebatziko dute. Azkenik, horren emaitza Eurotaldeari helaraziko diote datorren asteartean telefono bidez izango den konferentzia batean.