Mundua -
Kanpainan agindutakoa
Brownek batasuna eta Edinburgori eskumen gehiago ematea eskatu du
Erresuma Batuko lehen ministroa izandakoak esan du berak eta hiru alderdi nagusiek eskumen gehiago emateko egutegia beteko dutela.
Erredakzioa
Gordon Brown Erresuma Batuko lehen ministro ohiak eta Eskoziako erreferendumeko "ezezkoaren" ordezkari nagusiak Eskoziako batasunaren alde lan egiteko eta Edinburgoko Parlamentuari eskumen gehiago emateko hartutako konpromisoa betetzeko eskatu du.
Kanpainan hitzaldi beroak egiteagatik "ezezkoaren" salbatzailetzat jo duten politikari laborista alderdi nagusiek erreferendumaren aurretik agindutakoaren bermatzaile gisa azaldu da.
2007tik 2010era Erresuma Batuko lehen ministro izandakoak (Tony Blairren ondoren) adierazi duenez, berak eta Britainia Handiko hiru alderdi nagusietako buruzagiek eskumen gehiago emateko egutegia beteko dutela sinatu dute "ebazpen" batean.
Independetziaren aldekoen gorakadaren aurrean, kanpainaren azken partean, Westminsterreko alderdi nagusiek autonomia gehiago eskaini zieten eskoziarrei, Erresuma Batuan geratzearen alde bozkatzen bazuten.
Brownek gaur Fifen, Eskoziako sortaldean, egindako hitzaldian, autonomiaren inguruan agindutakoa "bete egingo" dela esan du, eta ziur agertu da Eskoziako batasunaren alde lan egin ahalko dela, kanpaina elkarren kontrako akusazioek eta mehatxu salaketek markatu eta gero.
