16 biktima jada Kataluniako atentatutan, beste zaurituetako bat hil ostean

Bartzelonako Rambletan izandako atentatu terroristan zaurituetako bat hil egin da igande honetan. Hildakoa 51 urteko emakumezko alemaniar bat da, eta Bartzelonako Hospital del Mar erietxean zegoen ospitaleratuta abuztuaren 17az geroztik. Atentatuetan izandako biktima kopuruak gora egin du, eta 16 dira dagoeneko hildakoak.

Zaurituei dagokienez, 24 lagunek jarraitzen dute ospitaleratuta Kataluniako eta Aragoiko erietxetan: horietatik bost, oso larri daude, eta beste lau, berriz, larri.

Hildakoen artean, espainarrak daude (sei hildako), italiarrak (hiru), portugaldar bi, belgiar bat, estatubatuar bat, kanadar bat, australiar-britaniar bat eta alemaniar bat.

Ospitaletan jarraitzen duten 24 zaurituetatik 20 Rambletako harrapaketan zauritu ziren, eta gainerako laurak Cambrilsen (Tarragonan).