Baigorrira gaur iritsi dira zazpi errefuxiatu Calaisetik

Baigorrik (Nafarroa Beherea) zazpi errefuxiatu hartu ditu gaur goizaldean, eta hiru hilabetez egongo dira bertan. Afrika eta Ekialde Hurbileko gerretatik ihes egin zuten errefuxiatuak dira, Baigorriko herriko etxeak azaldu duenez. Kazeta.eus hedabideak eman du jakitera berria. Calaiseko (Frantzia) errefuxiatu gunetik joandako errefuxiatuak dira.

Hiiru sudandar, afganistandar bat, eritrear bat, tajikistandar bat eta apatrida bat dira Baigorrira heldu direnak. 50 ziren joatekoak Baigorrira, baina horra joan ahal izateko, Erresuma Batuan sartzeari uko egin behar zioten. Hori izan liteke, azkenean, zazpi izatearen arrazoia.

Calaisen dauden etorkin gehienek Britainia Handia dute helburu, baina Parisko erasoen ondotik Gobernu frantsesak mugetako kontrolak zorroztea erabaki duenez, beste aukera batzuk hartzen hasi dira.