Gizartea -
Aireportuak
Eusko Jaurlaritzak Forondarekiko duen jarrera salatu du De Andresek
Ana Oregi Ingurumen sailburua Forondarekin lotutako gaiak aztertzeko gaitasunik gabe geratu dela uste du Arabako ahaldun nagusiak.
Erredakzioa
Eusko Jaurlaritzak Forondako Aireportuarekiko mantentzen duen jarrera "onartezina" salatu du Javier de Andres Arabako ahaldun nagusiak; izan ere, Sprilur sozietate publikoak ez du Vitoria Industrial Air Park (VIAP) proiektua "garatzeko borondaterik". Azpiegitura zama terminal bihurtzea nahi du egitasmoak.
Gobernu zentralak Forondako aireportuarekiko "jarrera negatiboa" duela kritikatu zuen Ana Oregi Ingurumen eta Lurralde Politikarako sailburuak. Oregiren adierazpenak hizpide izan ditu De Andresek Gobernu Kontseilua amaitu eta gero.
Forondako Muga Ikuskaritza Puntuan albaitari propioak jartzea eskaini zion Eusko Jaurlaritzak Espainiako Gobernuari. Exekutibo zentralaren ezezkoa jaso dutela azaldu zuen Oregik iragan ostegunean. Proposamena "karga eta deskarga operazio handiak ez galtzeko" helburuarekin egin zuten, Oregiren ahotan.
Oregi Forondarekin lotutako gaiak aztertzeko gaitasunik gabe geratu dela ziurtatu du De Andresek; izan ere, VIAP proiektuarekin "aurrera jarraituko" ez duela iragarri du Sprilurrek dagoeneko.
Ekimena aurrera eramateko partida bat zuten 2013ko EAEren aurrekontuek, eta baita aurtengoek ere, ahaldun nagusiak gogorarazi duenez. Hala ere, "ezer ez" dutela egin salatu du De Andresek.
