Gizartea -
Manifestazioa
Garoña itxi eta 'berehala' eraisteko eskatu dute Gasteizen
Javier Marotoko Arabako hiriburuko PPko alkatea ez da protestan egon, nahiz eta manifestaziorako deialdia Udalak egindakoa izan.
Erredakzioa
Gasteizko bizilagunek Garoñako zentral nuklearraren itxiera eta 'berehalako' eraisketa eskatu dute manifestazio batean.
Protestan, oposizioko alderdi guztien ordezkariak izan dira (EAJ, PSE eta EH Bildu), baina ez Javier Maroto alkatea (PP). Udalak manifestazioa deitu zuenean, protagonismo osoa herritarrei uzteko asmoa agertu zuen Marotok, baina alkateari ez zaizkio batere gustatu manifestazioaren bukaerako manifestuan Espainiako Gobernuari egindako kritikak.
Manifestazioa 'Garoña behin betiko itxi eta berehala eraitsi- Por el cierre definitivo y desmantelamieto inmediato de Garoña' lelopean egin dute. Pankarta Ingurugiro Kontseiluko, Gizarte Kontseiluko eta ACOVIko ordezkariek eraman dute.
Martxa 18:30ean hasi da, Bilbao Plazan, eta Foruen Plazan amaitu. Bukaeran manifestu bat irakurri dute Elisa Rueda idazle, aktore eta euskara irakasleak eta Miguel Angel Ruiz Gizarte Batzordeko presidenteak.
"Ez da errentagarria"
Manifestua Gasteizko Udaleko taldeek adostu dute, PPk izan ezik, eta Espainiako Gobernuari zentrala "berehala" eraisteko exijitu diote, "berriro martxan jartzeko aukera guztiekin amaitzeko".
"Garoñaren jarduera arriskutsua da, horretan ez dago zalantzarik, eta, amortizatuta egon arren, erakunde publikoen diru-laguntzarik gabe ez da errentagarria. Ondorioz, herritar guztien baliabideak behar ditu", salatu dute.
