Krisi Ekonomikoa -
Protesta berriak
Milaka pertsona manifestatu dira Euskadin, Rajoyren murrizketen aurka
Manifestazioak hiru euskal hiriburuetan 19:00etan hasi dira, CCOO eta UGT sindikatuek deituta. 25.000 pertsona izan dira Bilbon, eta ehunka Donostian eta Gasteizen.
Erredakzioa
Milaka pertsona manifestatu dira gaur arratsaldean Bilbon, Donostian eta Gasteizen, "Estatua suntsitu nahi dute. Ekidin beharra dago. Matxinatu zaitez. Zure etorkizuna arriskuan dago" lelopean, Gobernuak aurkeztutako azken murrizketen aurka.
CCOO, UGT, SATSE, USO, CSIF, UTESE eta SAE sindikatuek deituta, manifestazioa 19:00etan hasi dute.
Manifestazioa deitu duten sindikatuen arabera, Bilbon 25.000 pertsonek parte hartu dute, eta martxaren buru, besteak beste, Unai Sordo CCOO sindikatuko idazkari nagusia eta Damaso Casado UGT-Euskadiko idazkari nagusia izan dira.
Jose Antonio Pastor euskal sozialisten bozeramailea eta Mikel Arana Ezker Anitzako koordinatzailea ere izan dira manifestazioan. Manifestatzaileek honako lelo hauek oihukatu dituzte: "Eskuak gora, hau lapurreta da", "Murrizketen aurka, greba orokorra"… Zerbitzu publikoak eta bankuak pribatizatzearen kontra egin dute.
Manifestazioaren amaieran irakurriko duten ohar batean, euskal erakunde publikoei, eta, batik bat Eusko Jaurlaritzari jarrera "begiralea eta beligerantea" mantentzea eskatu die euren konkurrentziaren "gainetik pasatzen" diren neurriak ez aplikatzeko.
Casadok azaldu duenez, sindikatuek batera lan egitea "funtsezkoa" da, eta pozik azaldu da gaurko manifestazioak beste sindikatu batzuen babesa izan duelako. Halere, beste sindikatu batzuek, besteak beste, ELAk eta LABek, manifestazio honekin bat egin ez izana deitoratu du. Azken bi sindikatu horiek irailaren 26rako greba orokorra deitu dute.
Datorren astean euskal sindikatu guztien arteko bilera bat bultzatuko duela esan du Sordok, abuztuan eta udazkenean manifestazioen agenda bat antolatzeko "ahalik eta erantzun bateratuena lortzeko".
Une hunkigarria DonostianDonostian ehunka pertsona manifestatu dira, 19:00etan Alderdi Ederretik hasitako manifestazioan. Manifestatzaileetako askok euren sindikatuen ikurrinak eraman dituzte sindikatuen siglekin, eta murrizketa sozialen, bankarien eta krisiaren aurka ohiu egin dute.
Manifestazioan, besteak beste, honako hauek izan dira: Rafaela Romero, Mikel Duran, Arritxu Marañon eta Susana Corcuera buruzagi sozialistak, eta Arantza Gonzalez Ezker Anitzako Gipuzkoako koordinatzailea. Unerik hunkigarriena Donostiako Askatasunaren etorbidean eman da, Corrugados Azpeitia enpresako langileak, kale horretan kanpatuta daudenak atzotik, txalo egin dute manifestazioan zihoazen pertsonekin batera.
Gasteizen, manifestazioa 19:00etan hasi da, lelo berberarekin, Andre Maria Zuriaren plazatik, eta La Floridan amaitu du.
Iruñean milaka pertsonek protestatu dute PPren Gobernuaren neurri ekonomikoen aurka. Manifestazioa 19:00etan hasi da, autobus geltoki zaharrean.
Juan Goyen eta Jose Maria Molinero UGTko eta CCOO sindikatuetako Nafarroako idazkari nagusiek, hurrenez hurren, beste sindikatu batzuetako buruzagiekin pankartak eraman dituzte, Roberto Jimenez PSN-PSOeko idazkari nagusiarekin eta Jose Migue Nuin Izquierda Ezkerrako bozeramailearekin batera.
