Ekonomia -
Apirileko datuak
Langabeziak egonkor eutsi du EAEn eta behera egin du Nafarroan
Apirilean aurreko hilabetean baino 22 langabe gutxiago zenbatu dituzte, baina urtebetean langabeziak % 5,71 egin du gora. Nafarroan 647 langabe gutxiago daude.
Erredakzioa
Apirilean martxoan baino 22 langabe gutxiago zenbatu zituzten EAEko enplegu zerbitzu publikoen bulegoetan eta guztira 161.896 langabe daude Araba, Bizkai eta Gipuzkoan, Espainiako Enplegu eta Gizarte Segurantza Ministerioak jakitera eman duenez.
Hala eta guztiz ere, 2011ko apirilaren aldean, langabezia % 5,71 hazi da, 8.741 langabe gehiago daude eta.
Lurralde historikoetako datuei dagokienez, Bizkaian soilik hazi zen langabezia apirilean, % 0,42 hain zuzen ere, Araban % 0,76 murriztu zen eta Gipuzkoan % 0,46.
Behera egin du Nafarroan
Nafarroan % 1,26 murriztu da langabezia martxotik apirilera eta guztira 50.905 langabe daude, aurreko hilean baino 647 gutxiago.
Enplegu eta Gizarte Segurantza Ministerioaren arabera, iazko apirilean baino 7.115 langabe gehiago daude Foru Erkidegoan, % 16,25 gehiago.
Langabeziak behera egin du Espainian
Espainiako Lan eta Gizarte Segurantza Ministerioak martxoan baino 6.632 langabe gutxiago (% 0,14) zenbatu zituen apirilean, eta guztira 4.744.235 pertsona daude langabezian Espainian.
