Horrelakoak izango dira greba orokorrerako gutxieneko zerbitzuak

Eusko Jaurlaritzako Lan eta Gizarte Gaietarako Sailak martxoaren 29ko greba orokorrerako ezarritako gutxieneko zerbitzuak:

BIDAIARI GARRAIOA

- Errepide, trenbide, itsaso eta kable garraioak egiten dituzten enpresek lanegun baten zerbitzuen % 30 eskaini beharko dituzte.

- Autobideetan eta ordainlekuetan jaiegunen zerbitzuak eskainiko dituzte, eta gasolindegietan % 30.

OSASUNA

- Ospitaleek jaiegun batean bezala funtzionatuko dute, eta zerbitzu hauek eskainiko dituzte: larrialdiak, sukaldea, elikagai banaketa, ospitaleratuta daudenen arretak, dialisiak, tratamendu onkologikoak eta zerbitzu atzeraezinak.

- Lehen mailako arretan, honako langileak izango dira: mediku bat zentroan, etxeko arretarako mediku bat, pediatra bat, erizain bat eta zelari bat. Larrialdi zerbitzuek eta Arreta Zerbitzu Iraunkorrek %100ean funtzionatuko dute.

- Osasun garraioetan, larrialdi zerbitzuei eta hemodialisiak eta tratamendu onkologikoak egiteko garraioei eutsiko diete. Ospitaleen arteko larrialdi garraioak eta Basurtuko ospitaleko larrialdiak ere bermatuko dituzte.

HEZKUNTZA

- Unibertsitatez besteko hezkuntzan, zentro publikoetako sarreren kontrol zerbitzuak bermatuko dituzte, eta bertan zuzendaritza taldeko kide bat eta langile bat izango dira.

- Euskal Herriko Unibertsitatean (EHU), atezain bat izango da txanda bakoitzean.

ENERGIA

- Argindar, gas eta ur ekoizleek jaiegun batean bezala.

EITB

- Bermatu beharreko gutxieneko zerbitzuak eguneko albistegiak izango dira, ohiko ordutegian.

JUSTIZIA

- Guardiako zerbitzuak indarrean izango dira, baita "eskubideei kalte egin edo haien galera ekar lezakeen epe-mugen gainditzearekin lotuta dauden ekimenak ere bai".

- Martxoaren 29rako deitutako ekitaldiak ere mantenduko dira, bertan behera uzteak arazoak sor ditzakeen kasuetan.

BESTELAKO ZERBITZUAK

- Udal hilerrietan ezinbesteko langileak izango dira bakarrik. Lurperatze eta errauste zerbitzuak egingo dira, baina "bestelako aukerarik ez dagoen kasuetan bakarrik".

- Larrialdietako eta errepideetako segurtasun zerbitzuetan (SOS DEIAK, suhiltzaileak eta bestelakoak) jai-egunetako langile kopuru bera izango dira.

- Adinduen egoitzetan eta eguneko zentroetan arreta zuzeneko zerbitzuen % 50 lanean izango dira, ordu jakin batzuetan izan ezik. Ordu horietan zerbitzua % 10 handiagoa izango da.

- Osotasun fisikoa mehatxatuta duten pertsonen segurtasuna ere bermatuta izango da. Horretarako, zerbitzuetako langileen % 50 lanean izango da.