Epsilon Euskadi borondatezko konkurtso prozesuan dago

Epsilon Euskadi automobil-enpresa borondatezko konkurtso prozesuan dago, inbertitzaile berri bat aurkitu ez duelako eta Vitalarekin eta Kutxarekin duen zorrei aurre egiteko gai ez delako. Gauzak horrela, enpresa honek aurkeztutako borondatezko konkurtsoaren aitorpenari oniritzia eman dio Gasteizko Merkataritza arloko 1. Epaitegiak. Epsilon Euskadiren arabera, enpresak ez du zorrei aurre egiteko kaudimenik.

Enpresa konkurtso aurreko egoeran zegoen eta 16 milioi euro baino gehiagoko zorra du Vitala eta Kutxa bankuekin. Epaitegian aurkeztutako eskaeran, zorrei aurre egiteko enpresak kaudimenik ez duela azaldu du, "maileguen epemugak ibilgailuen alorrean eman den krisiarekin bat egin duelako eta gainera, motorsportetik lortutako irabaziek behera egin dutelako".

Epaileak borondatezko konkurtso aitorpena onartu du. Horren ondorioz, Epsilon Euskadik administrazioa eta ondarren ahalmena mantenduko ditu eta, bitartean, epaileak izendatutako konkurtsoaren administratzaileek enpresan eskua sartuko dute.

Miñao (Araba) Parke Teknologikoan kokatutako enpresaren % 64 Eusko Jaurlaritzaren esku dago. Aurreko agintaldian 50 milioi euroko diru-laguntza publikoak jaso zituen. Laguntza hauen legezkotasuna zalantzan jarri dute egungo Eusko Jaurlaritzako buruzagiek. Zentzu honetan, Bernabe Unda Industria sailburuaren esanetan, "kudeaketa kaskar batek baimendu zuen zalantzazko operazio hura".