Ekonomia -
Funtzio Publikoaren Mahaia
Funtzio Publikoaren Mahaiaren bilera utzi dute UGT eta CCOOk
Jaurlaritzak negoziatzeko duen “borondate eza” salatu dute sindikatuek. ELA eta LAB, berriz, ez dira bileran izan eta Jaurlaritzak Gasteizen duen egoitzaren aurrean bildu dira.
Erredakzioa
Euskal Administrazioaren Mahai orokorraren bilera izan da goizean. ELA eta LAB sindikatuak ez dute parte hartu eta UGT eta CCOO sindikatuek bilera hasi eta ordu erdira alde egin dute. Jaurlaritzak negoziatzeko duen “borondate eza” salatu dute.
Lan baldintzak mantentzen jarraitzeko asmoa agertu du Jaurlaritzak, sindikatuen proposamenak kontuan izan gabe. Ondorioz, bilera utzi dute UGT eta CCOOk.
ELA eta LAB, berriz, ez dira bileran izan eta ordezkariak Jaurlaritzaren egoitzaren aurrean bilkura egin dute, Gasteizen. Ezarritako “murrizketen” aurka protesta egin dute.
Arantza Agote, UGTko ordezkariak, eta Mari Cruz Vicente, CCOOko ordezkariak, adierazi dutenez, Eusko Jaurlaritzak sindikatuek egindako proposamenak atzera bota ditu. Hori dela eta, sindikatuen aburuz, “ez du zentzurik Mahaian jarraitzeak”.
Sindikatuen aldarrikapenen artean ondorengoak daude, besteak beste: 1.492 orduko urteko lanaldia, funtzionarioen bajak lehen egunetik betetzea eta KPIaren igoeran 2014ko soldatan ezartzea dago.
Datozen egunetan erabakiko dituzte UGT eta CCOO sindikatuek mobilizazioak. UGTko ordezkariak sindikatuen arteko elkartasun eza deitoratu du. ELA eta LABek abenduaren 17rako protestak deitu dituzte euskal Administrazioaren zentroetan.
