Jose Antonio Sistiaga hil da, Gaur taldeko azken artista

Jose Antonio Sistiaga artista donostiarra, Gaur talde mitikoa sortu zutenetatik bizirik zegoen bakarra, hil da ekainaren 25 honetan, 91 urte zituela, Donibane Lohitzuneko bere etxean, bihotzekoak jota.

Euskal artearen izen nabarmenetakoa, pasa den ostegunean Donostian izan zen Tabakalerako "That Time" erakusketaren inaugurazioan.

Jose Antonio Sistiaga 1932ko maiatzean jaio zen Donostian eta Parisen zein Eivissan ere bizi izan zen Iparraldean kokatu arte. Arte esperimentalak eta naturak leku garrantzitsua izan zuen bere ibilbidean.

1966an Gaur taldea sortu nuen Amable Ariasekin, Rafael Ruiz Balerdirekin, Nestor Basterretxearekin, Eduardo Chillidarekin, Remigio Mendibururekin, Jorge Oteizarekin eta Jose Luis Zumetarekin batera. Azken hori 2020an hil zen, covid-19aren ondorioz ezarritako konfinamendu garaian.

"De Rerum Natura" atzera begirakoa

Iaz, Donostiako Kubo aretoak "De Rerum Natura" atzera begirakoa eskaini zion. Urtarriletik maiatzera, ia 100 lan erakutsi zituen, besteak beste, "... ere erera baleibu izic subua aruaren..." berak asmatutako hizkuntza batean idatzitako izenburua daraman munduko lehen luzemetrai abstraktua. 1968 eta 1970 bitartean margotu zuen zuzenean zeluloide gainean.

Zinema pintatuaren aitzindariak, lan grafiko garrantzitsua eta mihise handi eta koloretsuak ere egin zituen, figuraziotik informalismora igaroz, paisaiekiko zuen lotura galdu gabe, eta horrek abstrakziora eraman zuen, bere ikurretako bat izan zena.

50eko hamarkadaren bigarren erdialdean eta 60ko hamarkadaren hasieran egindako lanetan bere bizitza nomadaren seinale asko daude. Tinten kasuan, beltzetik kolorerantz egin zuen Sistiaga Balear Uharteetara joan zenean.

Parisen bizi izan zen garaian, berriz, informalista frantsesen eragina antzematen da bere obran eta Donostiara itzultzean, erreferentzia sinbolista eta postinpresionistak zituzten paisaiak lantzen zituen, Donostiari eskanitako lan antologikoan ikusi ahal den bezala.

Tamaina handiko olio monumentalak egin zituen, Francisco Javier Saenz de Oiza arkitekto nafarraren Madrilgo Torres Blancas eraikinerako egin zuena, adibidez, baina ez da kontserbatu.

Heriotzaren berri zabaldu ondoren, euskal erakunde eta kultur arduradunen erreakzio ugari bildu dira sare sozialetan, besteak beste, Euskadiko Filmategiarena, Gipuzkoako jarduneko Kulturako foru diputatu Maria Jose Telleriarena eta Nafarroako Oteiza Museoarena, non Sistiagak 2015ean erakusketa bat egin baitzuen.