Realak Dinamo Kieven bisita hartuko du etxean, hazten jarraitzeko asmoz

Realak Dinamo Kieven kontra jokatuko du, gaur gauean, 21:00etatik aurrera, Europa Leagueko ligaxkaren seigarren jardunaldian. Imanol Alguacilen jokalariek hazten jarraitu nahi dute, azken neurketetako lan onari eutsita; izan ere, zazpi partidatatik seitan izan da nagusi Donostiako taldea.

Joan den asteburuan, Leganes mendean hartu zuen Realak Ligan (0-3); Europan ere, Ajaxi irabazi zion azken jardunaldian. Beraz, txuri-urdinak hiru puntuak etxean uzteko helburuz zelairatuko dira, eta denboraldi hasiera kaskarra atzean utzi.

Bolada onaren bidean, Orri Oskarsson islandiarra deialdian sartu da, soleoan zituen arazoak osatuta, golen bat sartu eta taldeari laguntzeko prest.

Era berean, joan den igandean Leganeseko norgehiagoka min hartuta amaitu zuten jokalariak ere deituta daude gaurko hitzordurako; beraz, badirudi susto txikiak baino ez zirela izan.

Aurrean, Dinamo Kiev izango du, Europa Leagueko ligaxkan azken tokian dagoen taldea. Oraingoz, ez du partida bat bera ere irabazi jokatutako bost jardunaldietan, eta, hortaz, punturik gabe dago, nahiz eta, hasiera batean, lehen 24 sailkatuen artean egoteko faboritoen artean izan.