Realak eta Bartzelonak Erregina Koparen finala Zaragozan jokatuko dute

Realak eta Bartzelonak maiatzaren 18an jokatuko dute Erregina Koparen 42. edizioko finala, 19:00etatik aurrera, Zaragozan, La Romareda futbol-zelaian, astearte honetan Espainiako Futbol Federazioko Batzorde Kudeatzaileak erabakitakoaren arabera.

Denboraldi honetan, bi talderen arteko ohiko finalaren formatua berreskuratu du txapelketak, azken edizioetan egindako lauko finalen ordez. 30.000 ikuslerentzako tokia du Zaragozako La Romareda zelaiak. 1991ko eta 2009ko finalak ere han jokatu zituzten: Añorga KKE euskal taldea izan zen nagusi batean, eta Bartzelonako RCD Espanyol taldea, bestean.

Bai Reala, 2019ko txapelduna, bai Bartzelona, bederatzi aldiz Erregina Koparen txapeldun, partida bakarrera jokatutako kanporaketak irabazita iritsi dira finalera.