Kieran Tierneyk lesioa du, ezker izterreko iskiosural giharrean, eta aste batzuk emango ditu jokatu ezinik

Kieran Tierney Realeko atzelariak lesioa du "ezker izterreko iskiosural giharrean", Gipuzkoako klubak azken orduetan baieztatu duenez. Tierneyk, ondorioz, aste batzuk emango ditu jokatu ezinik.

Futbolari eskoziarra larunbatean lesionatu zen, Reale Arenan, Reala-Athletic derbian, EA Sports Ligako zortzigarren jardunaldiko partidan (3-0); 26. minutuan, jokaldi batean, eskua altxatu zuen, eta lurrean gelditu zen, minduta. Aihen Muñoz zelairatu zen haren ordez.

Realak adierazi duenez, Tierney "fisioterapia bidezko tratamenduarekin hasi da"; jokalaria lesioaren eta haren eboluzioaren arabera itzuliko da aktibitatera. Talde txuri-urdinak asteartean du hurrengo partida, Salzburgon, Txapeldunen Ligako multzoen faseko bigarren jardunaldian, 18:45ean hasita.