Horrela egin ditu Yuri Berchichek bi gol ikusgarri Athletic-Mallorca partidan, 17. minuturako

Yuri Berchiche Athleticeko jokalariak 1-0eko eta 2-0eko golak sartu ditu Athletic-Mallorca partidan, 2023-24 denboraldiko EA Sports Ligako 23. jardunaldiko partidan, San Mamesen, ostiralean. Ikusgarriak izan dira biak, futbolari zarauztarrak erremate oso zailak eginez lortu dituelako.

1-0ekoa 3. minutuan heldu da. Nico Williamsek falta bat atera du Mallorcaren areara, eta Yurik, penalti puntutik, atzeraka, ezkerreko oina sartu du; baloia Rajkovicen ezkerreko zutoinera irten da, eta atezainak ezin izan du gola saihestu.

17. minutuan, Nico Williamsek korner bat atera du, Mallorcaren atearen eskuinetik; hegaleko nafarraren erdiraketa Gorka Guruzetak jo du, atzerantz, baloiak berdegunea ikutu baino lehen, eta Yurik, area barrutik, eskuinez, baloiak boterik eman gabe, angelutik sartu du: 2-0.

Bi gol horiek zenbatuta, Yuri Berchichek hiru daramatza Ligan denboradi honetan; izan ere, Getaferi sartu zion bat, falta jaurtiketa baten bidez.