Alaves azken postura jaitsi da, Atleticoren aurka galdu ondoren (4-1)

Alavesek galdu egin du Atletico Madrilen etxean lehen zati kaskarra jokatuta, eta Ligako sailkapeneko azken postura erori da 22 punturekin.

Simeoneren jokalariak azkar aurreratu dira markagailuan; izan ere, 10. minuturako agintzen ziren markagailuan Joao Felixen burukada on bati esker. Tarte horretan, gasteiztarrak erabat noraezean zebiltzan zelai gainean, eta nahiz eta gerora neurketan sartu diren, ez dute inolako arriskurik eraman Oblaken atera lehen zati osoan.

Hala ere, atsedenaldiak mesede egin dio Gasteizko taldeari, eta bi aldaketa egin ondoren (Manu Vallejo eta Ximo Navarro sartu dira min hartuta zeuden Pere Ponsen eta Ruben Duarteren ordez) Atletico baino gehiago izan da bigarren zatiko lehen ordu erdian. Hala, markagailua orekatzeko gai izan da 63. Minutuan, Gonzalo Escalanteren bidez.

Norgehiagokaren joera arabarren aldekoa zela zirudienean, Florian Lejeunek penalti argia egin dio Matheus Cunhari, eta Luis Suarezek ez du barkatu Pachecoren aurrean.

Fitxa teknikoa:

4 - Atletico Madril: Oblak; Vrsaljko, Savic, Giménez (Felipe, 86. min), Reinildo, Lodi (Carrasco, 46. min); Llorente (Cunha, 72. min), Kondogbia, Lemar (De Paul, 46. min); Griezmann (Luis Suárez, 60. min), Joao Félix.

1 - Alaves: Pacheco; Tenaglia, Laguardia, Lejeune, Duarte; Escalante, Pina (Pellistri, 77. min); Édgar (Loum, 77. min), Pere Pons (Manu Vallejo, 46. min), Luis Rioja (Miguel, 86. min); Joselu.

Golak: 1-0, 10. min: Joao Félix. 1-1, 62. min: Escalante. 2-1, 75. min: Luis Suárez, penaltiz. 3-1, 82. min: Joao Félix. 4-1, 88. min: Luis Suárez.

Epailea: Melero López. Marcos Llorenteri txartel horia erakutsi dio (71. min).