Alavesek 72 milioi euroko aurrekontua izango du 2021-2022 denboraldirako

Astelehen honetan, abenduaren 20an, Alaveseko Akziodunen Batzarrean onartu egin da 72 milioi euroko aurrekontua 2021-2022 denboraldirako, ehuneko 99,26ko babesarekin. Gainera, 2020-2021 denboraldiko kontuak ere onartuak izan dira.

Iragan denboraldiko (2020-2021) balantzeak 2.067.607 euroko galerak izan zituen covid-19aren pandemiak eraginda. Klubak azken hamar urteetan lehen aldiz izan ditu galerak. Bestalde, denboraldi honetarako (2021-2022) aurreikusi dituzte, 71.938.886 euroko diru-sarrerak eta 71.917.767 euroko gastuak 21.119 euroko superabitarekin, beti ere pandemiaren nondik norakoek baldintzatuta.

Estatutuak egungo legedira eta teknologia berrietara egokitzea onartu da Akziodunen Batzarrean; ondorioz, batzar eta bozketa telematikoak egiteko aukera egongo da.