Bengoetxea: 'Jaurlaritzak ez du eskumenik boto eskubidea murrizteko'

Ordiziako koronabirus agerraldiaren ondoren, eta Eusko Legebiltzarrerako Hauteskundeen atarian, Eusko Jaurlaritzak protokolo bat onartu du kutsatuta eta koarentenan dauden herritarrentzat. Horren arabera, COVID-19 gaitza dutenek ezingo dute botorik eman.

Gaurko datuen zain, Nekane Murga Osasun saiburuak emandako azken datuen arabera, 200 pertsona inguru dira bihar botoa emateko eskubiderik izango ez dutenak. Erabaki horrek, besteak beste, EH Bilduren helegitea ekarri du, eta Hauteskunde Batzordeak gaur bildu beharko du, gaia aztertzeko.

Euskadi Irratian egindako elkarrizketan, Jose Ramon Bengoetxea Zuzenbidean doktoreak eta EHUko irakasleak garbi esan du boto eskubidea "eskubide absolutua" dela eta Eusko Jaurlaritzak ez duela eskubide hori "murrizteko eskumenik".  "Positibo eman dutenek botoa eman nahi badute, sistema bat bilatu beharko litzateke. Botoa emateko aukera ahalbidetu egin behar zaie. Postarako aukera itxita dute, eta beste bide batzuk aurkitu beharko lirateke", esan du.

Murgak, atzoko agerraldian, beste gaixo batzuekin alderatu zuen koronabirusa dutenen egoera, baina Bengoetxeak uste du sailburuak emandako azalpena ez dela baligarria. "Pertsona bat ezinduta badago eta botoa eman nahi badu, posta bidez botoa emateko aukera du", zehaztu du.

EHUko irakaslearen arabera, ebazpen judizial batek bakarrik mugatu dezake botoa emateko eskubidea. Eskubide absolutu bat den heinean, horretarako baliabide guztiak jarri behar zaiezkiela herritarrei, baita gaixo daudenei ere, gaineratu du.

Hego Korean eta Frantzian egin berri diren hauteskundeak jarri ditu adibidetzat. Bi herrialde horietan koronabirus probetan positibo eman duten herritarrei botoa emateko baliabideak eskura jarri zaizkiela nabarmendu du.