Zuntzaren postea 10 metrora baina Kalbaixo jatetxean banda zabalik ez. Landa eremuko internetaren gorabeherak

Mutrikuko Laranga auzoan dago Kalbaixo jatetxea. 15 metrora daukaten posteraino pasa dute zuntz optikoa, baina kutxa jarri eta beraiengana noiz iritsiko zain daude.

Iñaki Urbietaren ametsgaiztoa 2023ko urrian hasi zen. Kobrea lapurtu eta telefono finkorik gabe geratu ziren jatetxean. Txiripaz jatetxeko telefonoa mugikorrera desbideratuta zeukaten eta harri esker jaso ahal izan dituzte bezeroen deiak harrezkero.

Zelaieta jatetxea berriz, Mutrikuko Olatz auzoan dago. Idurre Ezenarro nagusia txoratzen dago, azkenean banda zabaleko interneta badutelako zuntz optikoari esker. Telefono finkoko linea moztu zioten fibra pasa aurretik eta malabarismoak egin behar izan ditu negozioari eutsi ahal izateko. Telefono mugikorrarekin estaldurarik ez eta bezeroen erreserbak jaso ahal izateko Mutrikun uzten zuen telefonoa amaren etxean hark enkarguak hartzeko. Ondoren, mugikorrarekin estaldura zeukan punturen bat topatzen zuen auzoan eta han jasotzen zituen enkarguak whatsapp bidez. Ondoren, konpainiaz aldatuta lortu zuen kobratu ahal izateko datafonoa erabiltzea, etxe inguruan besoa luzatuz estaldura topatuta. Tarte horretan zuntza pasatzen ari ziren langileak joaten zitzaizkion bazkalorduetan tupperrak berotzeko eskatuz garagardoa hartzera. Halako batean, irailean iritsi zen berera banda zabaleko interneta eta telefonoak jotzen duenean poz pozik jartzen da.

Zumaiako Santa Klara nekazal etxe eta behi hustiapenean ezinbestekoa dute banda zabaleko interneta behien zaintzarako baliabide teknologikoak erabiltzen dituztelako. Konexioa etendako bakoitzean makinak txistuka hasten zitzaizkiela kontatu digu Maite Mantzisidorrek eta esnea jeizteko robotak ez zuela funtzionatzen. Azkenean Abaila kooperatiba topatu eta instalazioa egitea erabaki dute. Xabier Garmendiak azaldu digu herrian dagoen azkeneko postetik baserrira 700 metro kable bota beharko dituztela zerbitzua izateko.