“Ez dagokigun lana eginarazi ordez, lana egiten utz diezagutela eskatzen dugu”

Aritz Eizagirre, Maite Manzisidor, Joseba Pagadizabal eta Aner Garitaonandia nekazari gazteak batu ditugu Zumaiako Xarrondobekoa baserriko ukuiluan. Guztiak bat etorri dira esatean, bizi duten egoera prekarioa dela. Hainbat dira bizi duten egoeraren arrazoiak.

Manzisidorrek esan digu, ekoizleak direla katearen oinarria: traktorea hartu, esfortzu fisikoa egin edota lurra lantzen dutenak; horregatik, ulergaitza dela beraiek izatea katean gutxien jasotzen dutenak.

Garitaonandiak, preziotik harago, ekoizpen moduan ere jarri du fokua; uste du, ezin direla alderatu modu industrialean ekoitzitako elikagaiak, eta baserritarrek ereindako ortuariak.

Pagadizabalek, besteak beste, gizarte-ereduaren aldaketak aipatu ditu. Azkartasunaren gizartean bizi garela, eta gero eta arreta gutxiago jartzen zaiola elikadurari.

Eizagirrek, burokraziak dakarkien gainkarga. Salatu du, azken hilabete gutxitan, ikaragarri hazi zaizkiela egin beharreko tramiteak. Gehiegizko lan-karga horren ondorioz, bazterrean utzi behar izan dituzte oinarrizko ekoizpen lanak.