Bilboko Arte Ederren Museoarekin lankidetza berritu du EiTBk

Asteartean, ekainaren 5ean, EiTBren eta Bilboko Arte Ederren Museoa Fundazioaren arteko lankidetza hitzarmena sinatu da. Miguel Zugaza Bilboko Arte Ederren Museoko zuzendariak, Juan Mari Aburto Bilboko alkate eta une honetan Arte Ederren Museoa Fundazioaren patronatuko presidenteak eta Maite Iturbe EiTBren zuzendari nagusiak hartu dute parte.

2001az geroztik Museoaren patronatuko kide den EiTBk Museoaren jardueren sustapen leiho izaten jarraituko du telebista, irrati eta Internet euskarrietan. Halaber, EiTB zabalik egongo da EiTB Taldeko zein Museoko langileek bi aldeentzako komunikazio proiektu interesgarriak proposatu eta garatu ahal izan ditzaten, eta horrelakoetan elkarlanean aritzeko aukera izan dezaten.