Azkena Rock Festivalek egunez eguneko kartela aurkeztu du

Behin kartela itxita, Azkena Rock Festival Gasteizek ekainaren 23 eta 24an hartuko duen jaialdiak egunez egun zer artistak joko duten iragarri du gaur.

John Fogerty izango da ostiraleko musika jardunaldiaren burua. Estatubatuarrak Creedence Clearwater Revival mitikoen kantu gogoangarriak eramango ditu Mendizabalara, eta, besteak beste, Cheap Trick eta Hellacopters egongo dira berarekin batera.

Larunbata Chris Isaaken eguna izango da, 2010eko bisitaren ostean berriz egongo baita kaliforniarra Gasteizko rock jaialdian. Egun horretan, baina, The Cult, Union Carbide Productions eta Michael Kiwanuka ere arituko dira, besteak beste.

Jaialdiak, gainera, egunez eguneko sarrerak jarri ditu salgai: 45 euroko prezioa (gehi gastuak) izango dute apirilaren 5era arte, eta bi eguneko bonuaren behin betiko prezioa 98 eurokoa izango da.