Donostiako Klasikoak munduko 18 talderik onenak bilduko ditu

World Team lizentzia duten munduko 18 talderik onenak Donostiako Klasikoaren irteeran izango dira uztailaren 29an, Frantziako Tourra amaitu ostean.

Antolatzaileek Ineos, Jumbo-Visma, Movistar Team, Quick Step eta Cofidis taldeak konfirmatu dituzte, besteak beste, zeintzuk txirrindulari lehiatuko diren zehaztea falta bada ere. Donostiako Klasikoak maila gorenena du nazioarte mailan jokatzen diren egun bakarreko lasterketen artean.

Maila goreneko 18 taldeez gain, antolatzaileek beste zazpi talde gonbidatu dituzte: Burgos BH, Caja Rural, Kern Pharma, Euskaltel-Euskadi, Ten Total Energies, Lotto eta Israel.

Julian Eraso antolatzaileak adierazi duenez, "Donostiako Klasikoak nazioarteko tropeleko txirrindularirik onenak bilduko ditu berriro, aurreko urteetan egin bezala", eta ziur agertu da ikusleek "aurreko ekitaldietako maila berbereko ikuskizuna" ikusiko dutela.

Ibilbide zaila

Lasterketak ibilbide zaila izango du; 230,3 kilometro eta zazpi mendate, 2019an Remco Evenepoelek irabazitako edizioaren oso antzekoa. Hura Evenepoelen lehen garaipena izan zen Donostian, 2022an ere bera izan zen nagusi.