Reala Celta berriz mendean hartzeko asmoz zelairatuko da, Kopako finalaurrekoen bila

Realak Errege Kopako final laurdenetako neurketa jokatuko du astearte honetan, Celtaren aurka, Balaidosen, 21:30etik aurrera. Azken lau egunetan indarrak neurtzen dituzten bigarren aldia izango da; izan ere, joan den larunbatean LaLiga EA Sportseko 21. jardunaldiko norgehiagokan lehiatu ziren. Donostiako taldea izan zen nagusi, 0-1, Brais Mendezen gol on bati esker.

Imanol Alguacilek gidatzen duen taldean ez da Aihen Muñoz izango, ezker belauneko aurreko lotailu gurutzatua hautsita duelako, larunbatean min hartu ostean. Jokalariari datozen egunetan egingo diote ebakuntza, taldeak igandean jakinarazi zuenez. Bestetik, Martin Zubimendik Vigora bidaia egin zuen astelehenean; hortaz, deialdian hartuko du parte.

Realak Osasuna final zortzirenetan 0-2 menderatuta lortu zuen final laurdenetarako txartela; Celtak, berriz, Valentziari irabazi zion, 1-3. Imanol "ilusionatuta" agertu zen astearteko hitzorduaren aurretik egindako adierazpenetan.

1:30

Imanol: ''Hiru partida geratzen dira finalerako, eta ilusio handiarekin gaude''