Joseba Agirrek Betisekin sinatu du, denboraldi amaierara arte, F Ligan mailari eutsi nahirik

Joseba Agirre entrenatzaile bizkaitarrak F Ligako Betisekin sinatu du, 2023-24 denboraldiko amaierara arte, ostegunean Andaluziako klubak iragarri duenez. Txapelketa amaitzeko bederatzi partida gelditzen direla, Betis hamabosgarren dabil F Ligan, alegia, jaitsiera postuan da, eta, beraz, Joseba Agirreren helburua izango da Betisek mailari eustea.

Joseba Agirrek, 60 urtekoa bera, Athletic entrenatu du, besteak beste. Talde zuri-gorrian zela, 2015-16 denboraldiko Liga irabazi zuen. Gerora, Athleticeko kirol zuzendari ere ibili zen.

Euskal entrenatzaileak Maria Pry ordezkatuko du, Betisen; hori bai, Pryk Sevillako klubeko kirol zuzendari bezala jarraituko du. Joseba Agirreren azken taldea Real Oviedo izan da. Larunbatean egingo du debuta, Betis-Eibar partidan (14:00etan da); norgehiagoka hori giltzarria da, bi taldeentzat.