Osasunak Cardona eta Estupiñan fitxatu ditu

Osasunak lanean jarraitzen du 2019-2020 denboraldirako taldea osatzeko. Astelehen honetan, Luis Sabalza presidenteak Radio Euskadin baieztatu du, talde gorritxoak Marc Cardona eta Pervis Estupiñan jokalariak fitxatu dituela.

Marc Cardonaren kasuan, Osasunak 2,5 milioi euro ordainduko dizkio Bartzelonari aurrelaria fitxatzeko. Pervis Estupiñan, aldiz, utzita helduko da Ingalaterrako Watford taldetik.

Cardona Eibarren egon da iragan denboraldian, eta 19 partida jokatu ditu: 17 Ligan, hiru gol sartuta, eta 2 Errege Kopan (golik sartu gabe). Estupiñanek, ordea, Bigarren Mailako Mallorcan jokatu du, eta Lehen Mailara igotzea lortu du. Ekuadorreko futbolariak 25 partida jokatu ditu Mallorcarekin, 19 ligan (3 gol), play-offetako lau neurketa, eta Errege Kopako bi norgehiagoka.

Avila fitxatu nahi dute

Luis Sabalzak gaineratu duenez, Osasunak Chimy Avila ere fitxatu nahi du. Iragan denboraldian Huescan maila ona eman zuen, eta talde gorritxoak interes handia du. Presidenteak, ez du argitu Xiscorekin zer gertatuko den.