Arbillak armagin izaten jarraituko du 2021era arte

Anaitz Arbilla nafarrak (Iruñea, 1987) Eibarrekin zuen kontratua luzatu du ostegun honetan, eta, hartara, 2021era arte jarraituko du talde armaginean. Jokalariak 2019ra arte zeukan sinatuta aurreko kontratua; beraz, bi urte gehiagoz jarraituko du talde gipuzkoarrean.

Denetara, bost urte beteko ditu Arbillak Eibarren, 2016-2017 denboraldian iritsi baitzen Espanyoletik. Egun 31 urte dituen jokalariak 34 urte izango ditu kontratuaren amaieran.

Nafarrak Ligako 59 partida eta Kopako 3 jokatu ditu armaginekin, eta hiru gol erdietsi ditu.

Arbillak berak klubeko medioei egin dien adierazpenetan azaldu duenez, "pozik" dago "Eibarren familiaren parte izateagatik". Horrez gain, bere ibilbide profesionala Eibarren "bukatzea" gustatuko litzaiokeela baieztatu du.