Athletic-Real Madril, Erreginaren Kopako finalerdietan

Athleticek Real Madril izango du aurkari Erreginaren Kopako finalerdietako kanporaketan, eguerdian Espainiako Futbol Federazioaren (RFEF) egoitzan egindako zozketaren arabera. Zuri-gorriek maiatzaren 24an jokatuko dute kanporaketa, 21:00etatik aurrera. Beste finalerdian, Alhama El Pozo eta Atletico Madril izango dira aurrez aurre, egun bat lehenago.

Lehiaketaren azken fasea Leganeseko Butarque futbol-zelaian jokatuko da, maiatzaren 23tik 27ra bitartean, eta irabazleak Bartzelona ordezkatuko du txapelketako palmaresean, aurreko hiru edizioak irabazi baititu. Talde katalana final-zortzirenetan geratu zen lehiaketatik kanpo, Osasunaren aurkako kanporaketan jokalari bat bidegabeki zelairatzeagatik.

Lehenengo finalerdia maiatzaren 23an jokatuko da, 21:00etan, eta bigarrena asteazkenean, ordu berean. Finala, ostera, larunbatean jokatuko da, 22:00etan, eta, Espainian jokatutako emakumezkoen txapelketa batean lehen aldiz, VARa erabiliko dute.

Txapelketako txanda honetara iristeko bidean, Iraia Iturregik zuzentzen duen taldeak Madril CFF (0-1) eta Osasuna (1-2) kanporatu zituen final-zortzirenetan eta final-laurdenetan, hurrenez hurren.