Athleticeko hauteskundeak: modu presentzialean botoa emateko gida praktikoa

Ostiral honetan egingo ditu Athleticek hauteskundeak zehazteko nor izango den klubeko presidentea eta nortzuk egongo diren Zuzendaritza Batzan ondorengo lau urteetan. Bilbotar klubeko bazkideek izango dute aukera botoa emateko, eta, lehen aldiz, San Mames futbol-zelaira joan beharko dute hori egiteko (posta bidezko botoa ez badute eskatu).

Jarraian, azalduko dugu zer izan beharko duten kontuan, ostiral honetan, botoa modu presentzialean emango duten Athleticeko bazkideek.

Non izango dira hauteskundeak? San Mames futbol-zelaian.

Zein ordutatik eman ahalko dute botoa? 9:00etatik.

Zein ordura arte eman ahalko da botoa? 21:00ak arte.

Zer agiri eskatuko diete bazkideei? NANa edo pasaportea. Indarrean izan beharko dira.

Nondik sartu beharko da San Mamesera botoa emateko? 22 eta 23 ateen artean bideratuko duten sarbide batetik. Klubak esan duenez, sarbide hori kanpoaldeko bideo-markagailuaren azpian izango da (Poza Lizentziatuaren kaletik da ikusgai).

Nora joan behar da botoa emateko? Antzinatasunik handieneko bazkideek, ezkerrera, 1-6 mahaietara. Gainerakoek, eskuinaldera, 7-24 mahaietara.

Nola jakin ahalko dute bazkideek zein mahaitan eman behar duten botoa? Athleticek jakinaraziko die, ostegunetik, hau da, hilaren 23tik, posta elektroniko baten bidez, eta baita web-orrian ere, bazkideentzako atal esklusiboan.

Nondik irten behar da zelaitik botoa eman ostean? 2 eta 3 ateen arteko gune batetik. Bazkideek, San Mamesen barruan, aurrerantz ibili beharko dute; ez dute izango zertan atzera jo.