Alavesek ez du amore eman, eta mendean hartu du Sevilla, azken minutuan (2-3)

Emozioz beteriko gaua izan da Sanchez-Pizjuan estadioan EA Sports Ligako 20. jardunaldian, Deportivo Alaves azken minutuan gailendu baitzaio (2-3) Sevillari. Bi taldeak gogor lehiatu dira jaitsiera postuetatik aldentzeko, eta babazorroek Duarteren golari esker lortu dute garaipena partidaren hondarrean.

Sevillak intentsitate handiarekin hasi du partida lehen minututik. Isaacek gola gertu izan du 1. minutuan, Kike Salasen erdiraketa baten ostean, eta Navasek bigarren minutuan jaurtiketa indartsua jo du atean, etxeko taldearen anbizioa erakutsiz. Hala ere, neurketaren norabidea guztiz aldatu da 26. minutuan, Tenagliak korner bat baliatu baitu Alaves aurretik jartzeko (0-1).

Lehen golaren ostean, arabarrak hazi egin dira, eta aldea handitu dute Kike Garciak 40. minutuan sartutako golari esker, Guevararen jokaldi on bat aprobetxatuz. Alavesek bere aukerak aprobetxatu ditu, eta aldeko 0-2ko emaitza erosoarekin joan da atsedenaldira.

Bigarren zatia arriskua sortuz eta Sevillaren defentsa estutuz abiatu du Alavesek. Hala ere, 70. minutuan, Rafa Mirrek 1-2koa sartu du, etxeko taldeari itxaropena emateko. Minutu batzuk geroago, 81ean, Alavesen arean zalantzazko jokaldi batek VARa berrikustera eraman du epailea, eta Sevillaren aldeko penaltia adierazi du. Ocampos izan da penalti-jaurtiketa egiteko arduraduna, eta bikain aprobetxatu du bere aukera, markagailuan 2-2koa jartzeko.

Ordura arte etsita bazeuden ere, etxekoak piztu egin dira gol horrekin, eta garaipenaren bila abiatu dira, mailari eusteko borrokan jarraitzeko. Hala ere, babazorroek ez dute amore eman, eta Duartek partida erabakita utzi du 90. minutuan, markagailuan 2-3koa ezarrita.

Fitxa teknikoa:

2- Sevilla: Dmitrovic; Jesus Navas (Juanlu, 69. min), Sergio Ramos, Marcao, Kike Salas (Pedrosa, 42. min); Suso, Soumare (Rafa Mir, 55. min), Rakitic (Sow, 55. min), Oliver Torres; Lucas Ocampos eta Isaac Romero (Mariano, 55. min).

3 - Alaves: Sivera; Gorosabel, Tenaglia, Rafa Marin, Javi Lopez; Guevara (Blanco, 92. min), Benavidez, Guridi (Sola, 72. min), Luis Rioja (Duarte, 72. min); Carlos Vicente (Parada, 92. min) eta Kike Garcia (Samu Omorodion, 72. min).

Golak: 0-1, 26. min: Tenaglia. 0-2, 40. min: Kike Garcia. 1-2, 70. min: Rafa Mir. 2-2, 80. min: Ocampos, penaltiz. 2-3, 89. min: Ruben Duarte.

Epailea: Alejandro Jose Hernandez Hernandez.