Rahm Travelers txapelketatik at geratu da

Jon Rahm Travelers Championshipetik at geratu da bigarren jardunaldiaren ostean. Ostiralean, ekainaren 23an, bizkaitarrak ez zuen kortea gainditu, eta ez du lehian jarraituko. Bestalde, PGA Tourreko txapelketa honetan Danny McCarthy eta Keegan Bradley daude berdinduta sailkapenaren buruan, bigarren eguna gaindituta.

Aurten Rahmek The Players txapelketa utzi behar izan zuen gaixotasunagatik, ta hura alde batera utzita, 36tan jarraian gainditu zuen kortea. 2021eko Fortinet Championshipa izan zen Barrikakoak (Bizkaia) amaierako bi jardunaldiak jokatu ez zituen azkena.

Cromwelleko (Connecticut, AEB) TPC River Highlands zelaian Rahmek +1eko txartelarekin amaitu zuen bigarren jardunaldia, bi birdie eta hiru bogey eginda. Ondorioz, guztira -2ko txartela aurkeztu zuen, baina aurrera jarraitzeko gutxieneko emaitza -4koa zen.