Merkel-osteko lehen eguna Alemanian: atomizazioa eta negoziazio korapilatsuak

Egunsenti nahasia dute Alemanian, hauteskunde-emaitza ez baita nahikoa datorrenari traza hartzeko. Olaf Scholz hautagaia buru, SPD Alderdi Sozialdemoktratak garaipena aldarrikatu du, eta, inoizko emaitzarik txarrenak lortu arren, kantziller izateko prestutasuna adierazi du CDUren hautagai Armin Laschetek. Biek ala biek lor lezakete Angela Merkel ordezkatzea, eta alderdi txikiek dute gehiengoa osatzeko giltza, Berdeek eta liberalek.

Danel Agirre eta Mikel Reparaz EITBko kazetariek eman dizkigute hauteskunde-biharamunaren gakoak Euskadi Irratiko "Faktoria"n. Reparazek esan du irabazleak Berdeak izan direla, eta aukera handia dutela exekutibo berrian agenda ekologista trinkotzeko. Agirrek ohartarazi du, baina, Berdeen lehentasunek talka egiten dutela liberalekin, eta horrek negoziazioak korapilatuko dituela: "Berdeek iraultza ekologikoa nahi dute, inbertsio handiak eginez, eta liberalek gastua murrizu".

Alderdiek eperik gabe negoziatuko dute datozen hilabeteetan, eta bat datoz Agirre eta Reparaz: "Ez dago hauteskunde berriak baztertzerik".