EAJ-PP ituna posiblea da Lopezentzat, murrizketekin bat datozelako

Patxi Lopez lehendakariaren iritziz, EAJk eta PPk etorkizunean "elkar uler dezakete" eta datorren legegintzaldirako Gobernu ituna egin, izan ere, biak murrizketen alde daude "eta dirua hizpide izan den bakoitzean, eskuineko bi alderduak oso ados jarri dira".

Patxi Lopezek urriaren 21eko hauteskundeen ostean izan daitezkeen itun guztiak aztertu ditu, ETAren indarkeriarik gabe egingo diren lehen hauteskundeetan, alegia. Inkesten arabera, Legebiltzarrean gehiengo abertzalea izango da, eta alderdi bozkatuena, EAJ. Haren atzetik, EH Bildu, PSE-EE eta PP.

Lehendakariaren ustez, lau eredu ezberdin daude aukeratzeko: PPrena, "murrizketak bata bestearen atzetik"; EAJrena, "murrizketak euskal eran"; Bildurena, "kudeaketa falta, zaborren eredua"; eta, azkenik, PSE-EErena.

PSE-EEren ereduaren harian, Eusko Jaurlaritzak ezarritakoa, oinarria "doitzean, eraginkortasunean, eta defizitaren konpromisoekin eta helburuekin betetzean" dago, baina Ongizatearen estatua eta "etorkizuna bermatzen duten laguntzak" kendu barik.

Urkullu eta murrizketak

Iñigo Urkullu EAJko presidenteak murrizketen inguruan esandakoa gogora ekarri du Lopezek. Izan ere, Mariano Rajoyk "egin behar zuena egin du" esan zuen jeltzaleen ordezkariak bere blogean, eta "hezkuntza-tasak igotzea eta osasuna garestitzearen alde" egin zuen baliabide gehiago izateko. CIUk Katalunian egin dituen murrizketen oso antzekoak, Lopezen esanetan.