Euskal ikus-entzunezko industriaren etorkizuna aztergai, EITBk eta Elkargik antolatutako jardunaldian

Asteazken honetan (otsailak 7), EITBren Bilboko egoitzan, Euskal ikus-entzunezko industria. Etorkizuna hemen da jardunaldi profesionala egin da EITB Komunikazio Taldeak eta Elkargi finantza erakundeak antolatuta. Ekitaldian, sektoreak bizi duen egoeraz hitz egin dute José Luis Rebordinos Donostia Zinemaldiko zuzendariak, Sergio Ezama Netflixeko Talentu zuzendari globalak eta Unai Iparragirre ETBko zuzendariak, Urko Odriozola Elkargiko Komunikazio zuzendariak gidatutako solasaldian. 

Hiru solaskideak, EITBko, Elkargiko eta euskal ekoizleen elkarteetako ordezkariekin

José Luis Rebordinosek euskal ikus-entzunezkoen industriak bizi duen "urrezko sasoia" azpimarratu du, "zinema komunitateak, zinemagileek eta ekoizleek hainbat urtez lan ona egin ondoren, baina baita EITBk, Zinemaldiak eta erakundeek ere". Berebat, nazioartean duen proiekzioa nabarmendu du. "Euskal zinema nazioartekotu egin da bere kalitate eta sendotasunari esker, kanalen dibertsifikazioa aprobetxatuz audientzia global batera iristeko", azaldu du. Rebordinosek azpimarratu duenez garrantzitsua da "Elkargi bezalako erakundeek finantzaketan eta fiskalitatean laguntzea, ahotsen aniztasuna eta proiektu interesgarrien garapena bultzatuko duen ikus-entzunezkoen euskal industria sendotzen laguntzeko". 

Sergio Ezamak, bere aldetik, streaming plataformaren arrakasta globalaren gakoak eta estrategiak aipatu ditu. "Netflixen, mundua istorio handiekin entretenitu nahi dugu, eta kontsumitzaileei entretenimendua eskuratzeko eta gozatzeko modu berri bat eskaini, edonon dagoela ere. Helburu horrekin, lan kultura aparta sortu dugu", azaldu du. Era berean, adierazi du bere helburua jendea inspiratzea dela: "Gure lantaldeek Netflixentzat onena dena egitea nahi dugu". Horrek, trukean, erantzukizun-zentzua eta autodiziplina eragiten ditu, eta horrek bultzatzen gaitu lanik onena egitera". 

Unai Iparragirre ere bat etorri da euskal zinemaren talentua eta lortzen ari diren ekoizpen eta sarien emaitza onak azpimarratzean. "Gure ustez, urrats garrantzitsu bat emateko unea da, gure ekoizpena nazioartera zabalduz eta gure ekoizpen fisikoetara hobeto bidaiatzea ahalbidetuko duten nazioarteko aliantzak bilatuz". Bere aburuz, EITB aliatu ona da Netflix bezalako plataforma batentzat, ekarpen handiak egiten dituelako eta ez delako konpetentzia. Iparragirrek adierazi du, gainera, "EITBn Netflixen laguntza izatea gustatuko litzaigukeela, gurea bezalako hizkuntza berezi eta zaharra babesteko, eta erakundean hain postu garrantzitsua duen norbaitek testuinguruari buruz duen ezagutza aprobetxatzea, Netflixen egoitza nagusian egoeraren berri eman dezan". 

Finantzaketa eta fiskalitatea 

Iban Garate kazetariak gidatutako jardunaldian, Andoni Aldekoa EITBko zuzendari nagusiak, Lander Arteche Elkargiko presidenteak eta Marta Mendinueta Elkargiko zerga arloko arduradunak hartu dute parte. 

"Bizkaian Euskadiko hiru Foru Lurraldeek onartutako neurri fiskalak balioesteko asmoz, Elkargik ikus-entzunezko industriari zerbitzu integral berri bat eskaintzen dio" adierazi du Mendinuetak. "Orain arte eman dugun finantzaketari fiskalitatea gehitu behar diogu, finantziazio iturri gisa; bi kasuetan, Elkargiren bermearekin doa finantzatzen dugun dirua. Horrek murriztu egiten du film luzeak egiteko operazioaren arriskua, eta segurtasun juridiko eta finantzarioa eskaintzen die ekoizleei, erakargarriagoa egiten du inbertsiogileentzat, eta, beraz, proiektu berriak sortzea errazten du", Mendinuetaren hitzetan. "Egiten ari garen lanari esker, iaz gure jarduera bost aldiz biderkatu zen", adierazi du.