Mikel Ayestaran, 'George Steer-Gernika bakearen aldeko kazetaritza' saria

Gernika-Lumoko Udalak "George Steer / Gernika bakearen aldeko kazetaritza" saria eman dio Mikel Ayestaran kazetari gipuzkoarrari. Bakea eta adiskidetzea sustatzeko saria banatuko du lehenengoz Udalak. 1937ko apirilaren 26an jasandako bonbardaketaren gertaerak mundu zabalera hedatu zituen britaniar kazetariaren izena darama sariak.

Sari horren bitartez, Ekialde Ertainean egon diren hainbat gatazketan jakintsua den Mikel Ayestaran (1975) kazetariaren lana saritu gura izan da. Sari horren helburua da, edozein nazioko informazioa lanbidetzat dutenen eta bakearen aldeko eta giza eskubideen aldeko kazetaritza egiten dutenen lana aintzatestea.

Sari banaketa apirilaren 27an izango da, Gernikako bonbardaketaren urteurreneko egitarauaren barruan.

Gernika-Lumok "egiarekiko konpromisoa erakutsi duten" kazetariei beste batzuetan ere eman die saria. 2006an, George Steer kazetariari omenaldia egin zitzaion eta duela bi urte Mathieu Corman kazetari Belgikarrari 'Ce Soir' egunkariak egindako lana saritu zitzaion. Horrez gain, Gernikak urtero ematen du "Bakearen eta Adiskidetzearen aldeko Saria", eta aurtengo saria Christos Stylianides zipretar politikariari eta Paul Preston, Angel Viñas eta Xabier Irujo historialariei emango zaie.