Prestaketa

Labea 180 ºC -tan goitik eta behetik berotzen jarri ondoren, bizkotxoaren prozedurarekin hasiko gara.

Horretarako 4 arrautzak azukrearekin harrotuko ditugu, hagaxka elektrikoen laguntzarekin. Jarraian ekilore-olioa gehitu eta irabiatzen jarraituko dugu. Ondoren, esnearekin berdin egingo dugu, baita kafearekin eta banillarekin ere.

Behin likidoak nahasi dizkiogunean, irin bahetua eta gatza erantsiko dizkiogu eta mihi baten laguntzarekin dena nahasiko dugu.

Nahaski guztia 3 molde txikitan banatuko dugu edo handi batean, nahi den moduan. Labea 160 ºC-tara jaitsi eta bertan 55-60 minutuz egosiko dugu.

Bien bitartean almibarra egingo dugu. Honetarako azukrea, ura, udare azalak eta likorea 10-15 minutuz egosiko ditugu. Ondoren katilu edo ontzi egoki batera atera eta hozten utziko dugu.

Betegarriaren txanda da. Hagaxka elektrikoen laguntzarekin hozkailutik atera berri izango ditugun esne-gaina eta gazta krematsua ontzi batean sendotasun arin bat hartu arteraino harrotuko ditugu. Momentu horretan glas azukrea gehituko diogu eta guztiz harrotu arte eragingo diogu berriz.

Esne-gain harrotuak sendotasun trinkoa behar du izan, ongi trinkotu arte eragin, baina kontuz, kolore horizta hartzen hasten den puntutik aurrera gurin gozoa lortuko baigenuke. Hozkailuan gorde.

Moka krema egiteko kafe hautsari banilla esentzia gehitu eta dena urtzen saiatu.

Hagaxkaren laguntzarekin gurina irabiatuko dugu krema bat egin arte. Jarraian, glas azukrea erantsiko diogu eta dena ongi bildu arte hagaxkarekin eraginez jarraituko dugu.

Pomada baten testura lortu dugunean, kafearen nahaskia erantsi eta berriro ere eragiten jarraituko dugu, dena ongi integratua den arte.

Bi zatitan banatu eta hozkailuan gordeko dugu, bata gozogintzako mahuka batean eta bestea ontzian bertan.

Bizkotxoa egin eta hoztu denean, laban zorrotz eta handi baten laguntzarekin hiru zatitan banatuko dugu, ahalik eta berdinduen. 3 moldetan egin badugu, hauek berdindu (nibelatu).

Amaitzeko, plater baten gainean bizkotxo xafla bat jarriko dugu oinarri gisa eta gainetik xarabearekin bustiko dugu.

Jarraian esne-gain geruza bat jarriko diogu eta honen gainea beste bizkotxo xafla batekin estaliko dugu. Segidan prozedura bera jarraitu; xarabea eta esne-gain geruza gehitu.

Bizkotxoaren azken xafla jarri aurretik azpialdetik xarabearekin bustiko dugu eta ondoren tarta itxiko dugu.

Jarraian ontzian gorde dugun moka-kremarekin tartaren zehar guztiak zein goialdea estaliko ditugu, geruza eder bat emanez.

Gozogintzako mahukan dugun moka-kremarekin tartaren gainaldea apainduko dugu (honetarako ildaskadun ahoaz baliatuko gara) eta zeharretan berriz txokolate malutak ipiniko dizkiogu tartari.