ETBk inoizko jarraipenik handiena egingo du Behobia-Donostia lasterketa jendetsua zuzenean eskaintzeko

27.000 lagun baino gehiagoren parte-hartzea izango duen Behobia-Donostia lasterketaren inoizko jarraipenik handiena eskainiko du igande honetan, azaroaren 10ean, ETB1ek eta baita eitb.eus-ek ere.

09:50ean hasita eta ia lau orduz, lasterketaren nondik norako guztien berri emango du ETBko kirol talde zabalak. Behobiatik abiatu eta Donostiako Boulevardean amaitzen den 20 kilometroko lasterketaren ibilbidean egoteaz gainera, hiru puntu garrantzitsutan egongo dira Euskal Telebistako kamerak eta kazetariak, Behobiako irteera zirraragarrian, Gaintxurizketako igoeran eta helmugan, une horretako emozio guztiak kontatzeko.

Kirol-lehia ez ezik, karrera jendetsuan parte hartzen duten denetariko talde eta norbanakoen atzean dauden istorioen berri ere emango dute emanaldian zehar. Anartz Agirre kazetariak eta Etor Mendia adituak egingo dute lasterketaren kontakizuna. Halaber, Iñigo Barrena, Sara Gandara eta Ane Muruamendiaraz kazetariek elkarrizketa eta lekukotasunak bilduko dituzte ibilbide osoan.