Jose Ramon Etxebarriak irabazi du Eusko Ikaskuntzaren Manuel Lekuona saria

Eusko Ikaskuntzak Jose Ramon Etxebarriari emango dio 2020ko Manuel Lekuona saria. Horrela, irakasleak “euskararen normalizazioan zientzietako goi-mailako hezkuntzan egindako ekarpen zabala eta euskal kulturarekiko duen konpromiso adierazgarria” aitortu nahi dute. 

1948an Gernikan jaioa, Jose Ramon Etxebarriak Industria Ingeniaritza ikasi zuen Bilboko Ingeniaritza Goi Eskolan, eta 1987an EHUn doktoratu zen. 1973an Udako Euskal Unibertsitatearen sorkuntzan parte hartu zuen, eta bertako irakasle izan zen. EHUko Bilboko Unibertsitateko Zientzia Fakultatean eta Bilboko Ingeniaritza Goi Eskolan klaseak eman zituen, 2018an erretiroa hartu zuen arte.

Zientzia eta teknologiarekin lotutako testuak euskaraz lantzen aritu da bere ibilbide osoan Etxebarria. 18 liburu argitaratu, eta ehunka artikulu ondu ditu, zientzia eta kultura gaiei buruz, batez ere “Anaitasuna” aldizkarian.

Oraindik ez dute zehaztu noiz jasoko duen saria 2006an euskaltzain urgazle izendatu zuten kulturgile eta zientzialariak.