Roglicek erakustaldia eman du erlojupekoan eta Itzuliko lehen liderra da

Primoz Roglic (Jumbo Visma) da 2022ko Euskal Herriko Itzuliko lehen liderra, astelehen honetan (apirilak 4) Hondarribian egin den lehen etapako erlojupekoa irabazita. Esloveniarrak erakustaldia eman du.

Roglicek 9 minutu eta 48 segundo behar izan ditu Hondarribian hasiera eta amaiera izan duen erlojupekoaren ibilbidea betetzeko. Bost segundo atera dizkio bigarren amaitu duen Remco Evenepoeli (Quick Step - Alpha Vinyl). Remi Cavagna (Quick Step - Alpha Vinyl) izan da hirugarren, 16 segundora.

Geraint Thomas eta Adam Yates Ineos Grenadiers taldeko txirrindulariak Roglicekiko 18 segundora helmugaratu dira, baita Aleksandr Vlasov (BORA hansgrohe) ere. Daniel Felipe Martinezek (Ineos Grenadiers) 21 segundo galdu ditu liderrarekiko.

Euskal txirrindulari onena Ion Izagirre (Cofidis) izan da; zortzigarren postuan amaitu du etapa, eta Roglicek baino 20 segundo gehiago behar izan ditu ibilbidea betetzeko. Gorka Izagirrek (Movistar) 12. bukatu du, 24 segundora. Pello Bilbaok (Bahrain Victorious) ez du saio ona egin eta 29 segundo galdu ditu irabazlearekiko.

Ikusi hemen sailkapen guztiak