Janis Timma Baskoniako jokalari ohia hil da, 32 urte zituela

Janis Timma, Baskoniako jokalari ohia, hilda topatu dute astearte honetan, Moskun (Errusia), 32 urte zituela. Letoniako saskibaloi jokalariaren gorpua Errusiako hiriburuko erdigunean kokatuta dagoen hotel batetik gertu agertu da, eta TASS Errusiako albiste agentziak jakitera eman duenez, heriotzaren arrazoi nagusia suizidioa izan daiteke.

Timmak Letonian ekin zion saskibaloiko bere ibilbideari, eta bertan Daugavpils Kraslava, DU Hansabanka, BA Riga, BA Keizamezs Riga, Barons Riga, Liepajas Lauvas, Ventspils eta VEF Riga taldeetan aritu zen. Azken horrekin Eurokopa txapelketan debutatu zuen 2014-2015 denboraldian. Gerora, beste bi denboraldi eman zituen Eurokopan ere, Zenit San Petersburgo taldearekin.

Baltikoko jokalariak Euroligan ere jardun zuen bost denboraldiz, tartean Baskoniarekin (2017-2018), Olympiakosekin, Khimkirekin eta UNICS Kazanekin.

Joan zen sasoian, Timmak Turkiako Darüssafakan eta Endesa Ligako Monbus Obradoiron jardun zuen. Galiziako taldearekin 10 partida jokatu zituen, eta batez beste 8,7 puntu, 4,1 errebote eta 2 asistentzia lortu zituen partida bakoitzeko. Dena den, bere ekarpena ez zen nahikoa izan Obradoirok mailari eutsi ziezaion.